(ប៉េកាំង)៖ បេសកកម្មរុករកឋានព្រះចន្ទ នៃយាន Chang’e-4 (ឆាងអ៊ឺ) របស់ចិនត្រូវបានបាញ់បង្ហោះហើយនៅថ្ងៃសៅរ៍នេះ និងត្រូវគេរំពឹងថា នឹងធ្វើការចុះចតជាលើកដំបូងលើតំបន់ចំហៀងម្ខាងទៀតរបស់ព្រះច័ន្ទ ដែលមិនបែរមករកភពរបស់យើង។ នេះ បើតាមការចេញផ្សាយដោយទីភ្នាក់ងារព័ត៌មានចិនស៊ីនហួរ នៅថ្ងៃសៅរ៍ ទី០៨ ខែធ្នូ ឆ្នាំ២០១៨។
យានអវកាស Chang’e-4 (ឆាងអ៊ឺ) រួមមានទាំងយានចុះចត និងអណ្ដែត ត្រូវបានបាញ់បង្ហោះដោយគ្រាប់រ៉ុក្កែត Long March-3B ចេញពីមជ្ឈមណ្ឌលបាញ់បង្ហោះផ្កាយរណប Xichang នៃខេត្ត Sichuan ភាគនិរតីប្រទេសចិនកាលពីម៉ោង ២៖២៣នាទីទៀបភ្លឺ ដែលនេះនឹងក្លាយជាការបើកទំព័រថ្មី នៃមហិច្ឆិតារុករកឋានព្រះចន្ទរបស់ចិន។
ដូច្នេះយានរុករកព្រះច័ន្ទ Chang’e-4 នឹងក្លាយជាកូនសោរដ៏សំខាន់ក្នុងការគាស់កកាយអាថ៌កំបាំងនៃព្រះច័ន្ទ ដ្បិតយានអាវកាសចិន មួយនេះមាន low-frequency radio astronomical observation នឹងធ្វើការអង្កេតលើផ្ទៃដី និងទម្រង់ដីរបស់ឋានព្រះចន្ទ ក៏ដូចជាស្វែងរកសមាសធាតុរ៉ែ និងរចនសម្ព័ន្ធនៃផ្ទៃព្រះចន្ទ ព្រមទាំងធាតុវិទ្យុសកម្ម neutron និងអាតូម ក្នុងគោលបំណងសិក្សាពីបរិស្ថានលើតំបន់ចំហៀងម្ខាងទៀតរបស់ព្រះច័ន្ទ។ នេះបើតាមរដ្ឋបាលអវកាសជាតិចិន (CNSA)។
(CNSA) បានឱ្យដឹងទៀតថា ចិនបានលើកកម្ពស់កិច្ចសហប្រតិបត្តិការអន្តរជាតិ ក្នុងកម្មវិធីរុករកឋានព្រះច័ន្ទ ជាមួយបច្ចេកវិទ្យានៃយានរុករក Chang’e-4 ដែលត្រូវបានអភិវឌ្ឍន៍ដោយក្រុមអ្នកវិទ្យាសាស្ត្រ មកពីបួនប្រទេសគឺ ហូឡង់ អាល្លឺម៉ង់ ស៊ុយអែត និងអារ៉ាប៊ីសាអូឌីត។ ចំណែកឯឧបករណ៍វិទ្យាសាស្ត្រចំនួន ០៣ អភិវឌ្ឍដោយសកលវិទ្យាល័យចិន ក៏នឹងត្រូវចូលរួមក្នុងបេសកកម្មនេះដែរ។
គួរបញ្ជាក់ថា បេសកកម្មរុករកឋានព្រះច័ន្ទ ឬយាន Chang’e-4 បានយកឈ្មោះតាមព្រះនាងក្នុងរឿងព្រេងបុរាណ ចិនឈ្មោះ Chang’e ហើយបេសកកម្មនេះត្រូវបានចាប់ផ្ដើមកាលពីឆ្នាំ២០០៤ ក្នុងនោះរួមមានទាំងការចូលគន្លង និងចុះចតលើឋានព្រះច័ន្ទ ដើម្បីនាំយកគំរូស្លាកស្នាមមួយចំនួនមកភពផែនដីវិញ។ ការបាញ់បង្ហោះយានអវកាស Chang’e-1 ត្រូវបានធ្វើឡើងកាលពីឆ្នាំ២០០៧ Chang’e-២ ឆ្នាំ២០១០, Chang’e-៣ កាលពីឆ្នាំ២០១៣ និង Chang’e-៥ កាលពីឆ្នាំ២០១៤ ព្រមទាំង Chang’e-៤ ក្នុងឆ្នាំ២០១៨នេះ។
ការរុករកឋានព្រះច័ន្ទនឹងក្លាយជាការបើកទំព័រថ្មីមួយ របស់ចិនក្នុងការពន្យល់ និងទម្លាយអាថ៌កំបាំងនៃឋានព្រះច័ន្ទ។ ចំណែកឯការបាញ់បង្ហោះយាន Chang’e-៤ នៅថ្ងៃសៅរ៍នេះគឺជាការបាញ់បង្ហោះដោយប្រើប្រាស់ស៊េរីរ៉ុក្កែត Long March ជាលើក ទី២៩៤៕
