ព័ត៌មានថ្មី! ប្រហោងខ្មៅយក្ស «Supermassive Black Hole» អាចបញ្ចេញឥទ្ធិពល ដូចចង្វាក់បេះដូង នៅក្នុងកាឡាក់ស៊ី!
(អាមេរិក)៖ ទិន្នន័យទើបទទួលបានថ្មីបង្ហាញថា ប្រហោងខ្មៅដ៏ធំមហិមាមួយជាប្រភេទ Supermassive Black Hole អាចបញ្ចេញរូបធាតុផ្សេងៗ ទៅកាន់ផ្ទៃកាឡាក់ស៊ីរបស់វា នៅក្នុងសកម្មភាពមួយប្រៀបដូចទៅនឹងចង្វាក់បេះដូងអ៊ីចឹង។ នេះបើតាមការចេញផ្សាយដោយសារព័ត៌មានរុស្ស៊ី Russia Today (RT) នៅមុននេះបន្តិចនារសៀលថ្ងៃសុក្រ ទី២១ ខែមេសា ឆ្នាំ២០១៧។
ក្រុមអ្នកវិទ្យាសាស្រ្តដែលបានធ្វើការពិនិត្យពិច័យទៅលើទិន្នន័យ ដែលប្រមូលយកបានដោយកែវយឺតអង្កេតការ Chandra X-ray របស់ទីភ្នាក់ងារអវកាសអាមេរិក NASA បានប្រទះឃើញការច្រាលចេញផ្ទួនៗគ្នា នៃភាគល្អិតថាមពល ដែលបង្កើតឡើងដោយប្រហោងខ្មៅនោះ។ ព្រឹត្តិការណ៍នេះត្រូវបានគេអះអាងថា មានភាពស្រដៀងទៅនឹងចង្វាក់បេះដូងដែលកំពុងរុញច្រានឈាម ចេញទៅកាន់សារពាង្គកាយរបស់មនុស្សយើង។
គួរបញ្ជាក់ថា កែវយឺតវិទ្យាសាស្រ្តរបស់អង្គការ NASA បានរកឃើញប្រហោងខ្មៅយក្សខាងលើនេះ នៅក្នុងកាឡាក់ស៊ីឈ្មោះ NGC 4949 ដែលស្ថិតនៅចម្ងាយប្រមាណ១៤៥លានឆ្នាំពន្លឺពីភពផែនដី ឬ ១៥០លានឆ្នាំពន្លឺពីកាឡាក់ស៊ីមាលគីវេយ៍ របស់យើង។ ជារៀងរាល់ ៥ ទៅ ១០លានឆ្នាំប្រហោងខ្មៅយក្សខាងលើនេះ តែងតែបញ្ចេញរលកសញ្ញាយក្ស ជះចេញពីខ្លួនវារាប់សែនឆ្នាំពន្លឺឯណោះ៕
