បើកាឡាក់ស៊ីមួយនេះមកបុកកាឡាក់ស៊ីយើង នោះប្រព័ន្ធព្រះអាទិត្យយើងនឹងត្រូវខ្ទាចចេញកាឡាក់ស៊ី… (ជឿទៅឆាប់ចប់)
(វ៉ាស៊ីនតោន)៖ កាឡាក់ស៊ីក្បែរខាងមួយ កំពុងសំដៅមករកកាឡាក់ស៊ី Milky Way ដែលហេតុការណ៍នេះនឹងបង្កភាពវឹកវរជាខ្លាំង ក្នុងតំបន់នៃកាឡាក់ស៊ីរបស់យើង រួមមានទាំងការធ្វើឲ្យប្រហោងខ្មៅយក្សភ្ញាក់ឡើង និងការធ្វើឲ្យប្រព័ន្ធព្រះអាទិត្យខ្ទាតចេញពី Milky Way ក៏ថាបានដែរ។ នេះបើតាមសម្តីក្រុមអ្នកវិទ្យាសាស្រ្តដកស្រង់ខ្លឹមសារដោយសារព័ត៌មាន Independent នៅរសៀលថ្ងៃសុក្រ ទី០៤ ខែមករា ឆ្នាំ២០១៩។
បើតាមការព្យាករណ៍ពីអ្នកវិទ្យាសាស្រ្ត កាឡាក់ស៊ីឈ្មោះថា Large Magellanic Cloud (LMC) អាចនឹងមកបុកកាឡាក់ស៊ី Milky Way ហើយបង្កការបំផ្លិចបំផ្លាញក៏ដូចជាចលាចលជាខ្លាំង នៅក្នុងតំបន់កាឡាក់ស៊ីយើងនេះ។ ការប៉ះទង្គិចគ្នានេះ ថែមទាំងអាចដាស់ឲ្យប្រហោងខ្មៅ Sagittarius A* ដែលសំងំនៅបេះដូងនៃកាឡាក់ស៊ីរបស់យើង ជាមួយមុខកាត់ប្រហែល ៤៤លានគីឡូម៉ែត្រ អាចកើនឡើងទំហំធំជាងមុនដល់ទៅ ១០ដង និងបញ្ចេញវិទ្យុសកម្មពោរពេញដោយថាមពល ទៅក្នុងលំហអវកាសជុំវិញវាបាន។
ទោះបីបាតុភូតនេះត្រូវគេរំពឹងថា នឹងប៉ះពាល់ដោយផ្ទាល់ដល់ផែនដីក៏ដោយ ប៉ុន្តែវាមានលទ្ធភាពអាចបង្កឲ្យប្រព័ន្ធសូឡារបស់យើង ខ្ទាតចេញពីកាឡាក់ស៊ី Milky Way ហើយរសាត់អណ្តែតតែលតោលក្នុងទីអវកាសបាន។ ប៉ុន្តែព្រឹត្តិការណ៍នេះនឹងមិនកើតឡើងក្នុងពេលឆាប់ៗខាងមុខឡើយ គឺរហូតទាល់តែ ០២ពាន់លានឆ្នាំទៀតឯណោះ។ កាឡាក់ស៊ី Milky Way ក៏ត្រូវអ្នកវិទ្យាសាស្រ្តព្យាករណ៍ថា នឹងប៉ះទង្គិចគ្នាជាមួយកាឡាក់ស៊ីមួយផ្សេងទៀតឈ្មោះថា Andromeda នៅ០៨ពាន់លានឆ្នាំមុខផងដែរ។
គួរជម្រាបថា កាឡាក់ស៊ីដូចជា Milky Way ត្រូវបានហ៊ុមព័ទ្ធដោយកាឡាក់ស៊ីរណបតូចៗដទៃទៀត។ កាឡាក់ស៊ីទាំងនេះ ដែលភាគច្រើនអណ្តែតនៅជុំវិញកាឡាក់ស៊ីមេរបស់វាដោយស្ងប់សុខនោះ តែងតែស្ថិតក្នុងសភាពយ៉ាងដូច្នោះ ដល់ទៅរាប់ពាន់លានឆ្នាំឯណោះ។ ប៉ុន្តែពេលខ្លះ ពួកវាក៏រំកិលចូលទៅដល់ចំណុចកណ្តាល ហើយត្រូវស្រូបយកដោយកាឡាក់ស៊ីមេរបស់ពួកវា ប្រសិនបើមានព្រឹត្តិការណ៍ផ្ទុះដ៏កក្រើកនៃផ្កាយយក្សផងដែរ៕
