អាចទៅរួចទេ? លោក ដូណាល់ ត្រាំ «ចង់ឲ្យមនុស្សទៅរស់នៅលើភពព្រះអង្គារ ឲ្យបាននៅក្នុងអាណត្តិរបស់លោកតែម្តង!»
(វ៉ាស៊ីនតោន)៖ ខណៈពេលដែលលោក ដូណាល់ ត្រាំ បានហៅវីដេអូខលដើម្បីអបអរអវកាសយានិកលោកស្រី Peggy Whitson ដែលបានបំបែកកំណត់ត្រាថ្មីក្នុងការចំណាយពេលវេលាយ៉ាងយូរជាងគេបំផុត នៅក្នុងលំហអាកាសនោះ លោកប្រធានាធិបតីអាមេរិកបានឆ្លៀតឱកាសនេះ ស្នើឲ្យមានការបន្ថែមល្បឿនកាលវិភាគសម្រាប់ការបញ្ជូនមនុស្សទៅដល់លើផ្ទៃដីនៃភពអង្គារ (Mars)។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅនារសៀលថ្ងៃអង្គារ ទី២៥ ខែមេសា ឆ្នាំ២០១៧។
ក្នុងការសន្ទនាខាងលើនេះលោក ដូណាល់ ត្រាំ បានលើកឡើងពាក់ព័ន្ធនឹងបេសកកម្មនៅភពអង្គារយ៉ាងដូច្នេះថា «យើងនឹងត្រូវតែបង្កើនល្បឿនវាបន្តិចថែមទៀត» ដែលប្រការនេះអាចបង្ហាញថា រូបលោកចង់ឃើញមានមនុស្សលោកយើង ជាន់លើផ្ទៃដីរបស់ភពក្រហមមួយនេះ នៅក្នុងអំឡុងអាណត្តិទីមួយ ឬក៏អាណត្តិទីពីររបស់លោកក្នុងនាមជាប្រធានាធិបតីសហរដ្ឋអាមេរិក។ ប៉ុន្តែលោកស្រី Whitson បានបញ្ជាក់ថាកាលវិភាគសម្រាប់បេសកកម្មនេះទំនងជាអាចប្រព្រឹត្ត ទៅបានរហូតទាល់តែដល់ឆ្នាំ២០៣០ ឬក៏យូរជាងនេះ ហើយវាប្រហែលជានឹងត្រូវធ្វើឡើងដោយក្រុមអវកាសយានិកជំនាន់ក្រោយឯណោះទេ។
គួរបញ្ជាក់ថា យោងតាមសេចក្តីប្រកាសព័ត៌មានរបស់អង្គការ NASA លោកស្រី Whitson បានបំបែកកំណត់ត្រាចាស់ស្តីពីការស្នាក់នៅក្នុងទីអវកាសអស់រយៈពេលយូរជាងគេបំផុតដោយអវកាសយានិកអាមេរិក បន្ទាប់លោកស្រីបានស្ថិតនៅក្រៅភពផែនដីលើសពី ៥៣៤ថ្ងៃ។ បន្ថែមពីនេះលោកស្រី Peggy Whitson ក៏បានបំបែកកំណត់ត្រាថ្មីមួយផ្សេងទៀត ដោយការក្លាយជាស្រ្តីដំបូងគេបំផុត ដែលបានកាន់តួនាទីជាអ្នកបញ្ជាគ្រប់គ្រងស្ថានីយ៍អវកាសអន្តរជាតិ ISS ហើយគិតបញ្ចូលទាំងបេសកកម្មនាពេលបច្ចុប្បន្ននេះថែមទៀត លោកស្រីក៏បានក្លាយជាស្រ្តីដំបូងគេ ដែលបានបញ្ជាគ្រប់គ្រងស្ថានីយ៍ ISS ដល់ទៅពីរលើកផងដែរ៕
