ស្វែងយល់បន្ថែមពីយានអវកាស OSIRIS-REx របស់ NASA ដែលនឹងហោះត្រឡប់មកផែនដីវិញនៅឆ្នាំ២០២៣!
(អាមេរិក)៖ យានអវកាស OSIRIS-REx របស់អង្គការ NASA មានគោលដៅចម្បងប្រមូលយកគំរូស្លាកស្នាមពីអាចម៍ផ្កាយ Bennu ត្រឡប់មកផែនដីវិញដើម្បីធ្វើការវិភាគ។ ប៉ុន្តែមុនពេលវាអាចចុះទៅកាន់ផ្ទៃរបស់ Bennu បាន ក្រុមការងារបេសកកម្មត្រូវតែពិនិត្យមើលរូបភាព ទិន្នន័យ និងព័ត៌មានឯទៀតៗ ដើម្បីផ្តល់លទ្ធភាពខ្ពស់បំផុតតាមតែអាចធ្វើបានទៅឲ្យយាន OSIRIS-REx ធ្វើការចុះចតដោយសុវត្ថិភាព។
ដោយឡែកបញ្ហាប្រឈមមុខ ចំពោះការចុះទៅដល់ផ្ទៃរបស់ Bennu ទៅទៀតនោះ គឺការព្យាយាមចូលទៅកាន់គន្លងគោចររបស់អាចម៍ផ្កាយនេះ។ កាលពីអំឡុងខែធ្នូឆ្នាំទៅមិញ យាន OSIRIS-REx បានធ្វើការអង្កេតជំហានបឋមលើ Bennu តាមរយៈការហោះឆ្វែល Flyby ចំនួន ៣លើក នៅតំបន់ប៉ូលខាងជើង ប៉ូលខាងត្បូង និងអេក្វាទ័ររបស់អាចម៍ផ្កាយនេះ។ ទិន្នន័យបានមកពីការហោះ Flyby ទាំងនេះ អនុញ្ញាតឲ្យក្រុមការងារ OSIRIS-Rex ធ្វើការប៉ាន់ប្រមាណបានច្បាស់លាស់ត្រឹមត្រូវជាងមុនអំពីម៉ាស់របស់ Bennu ដើម្បីឲ្យយានអវកាសចូលទៅក្នុងគន្លងជុំវិញអាចម៍ផ្កាយនេះបាន កាលពីថ្ងៃទី៣១ ខែធ្នូ។
គួរជម្រាបថា យាន OSIRIS-REx ត្រូវបានបញ្ជូនឡើងទីអវកាសនៅខែកញ្ញា ឆ្នាំ២០១៦ ដើម្បីជួយឲ្យអ្នកវិទ្យាសាស្រ្តយល់ដឹងកាន់ច្រើន អំពីដំណាក់កាលដំបូងនៃការកកើតនៃប្រព័ន្ធព្រះអាទិត្យ។ យានអវកាសនេះត្រូវកំណត់ថា នឹងទម្លាក់ខ្លួនចុះមកផែនដីដោយប្រើឆ័ត្រយោង នៅវាលខ្សាច់រដ្ឋ Utah ភាគខាងលិចសហរដ្ឋអាមេរិក នៅខែកញ្ញា ឆ្នាំ២០២៣ នៅពេលវាត្រឡប់មកវិញជាមួយគំរូស្លាកស្នាម ដែលប្រមូលមកពីផ្ទៃនៃអាចម៍ផ្កាយ Bennu នៅពាក់កណ្តាលឆ្នាំ២០២០៕
ប្រភព៖ វែបសាយ Space.com
