ការសិក្សាថ្មី៖ រាប់ពាន់លានឆ្នាំទៀត ព្រះអាទិត្យយើងនឹងក្លាយជា «ដុំគ្រីស្តាល់យក្ស» នៅក្នុងទីអវកាស
(អាមេរិក)៖ រាប់ពាន់លានឆ្នាំទៅមុខទៀត ព្រះអាទិត្យរបស់យើងនឹងប្រែក្លាយទៅជាដុំគ្រីស្តាល់យក្សមួយក្នុងទីអវកាស ក្រោយពីវាអស់ថាមពល។ នេះបើតាមលទ្ធផលសិក្សាថ្មីមួយដកស្រង់ខ្លឹមសារដោយវែបសាយ Space.com នៅយប់ថ្ងៃសុក្រ ទី១១ ខែមករា ឆ្នាំ២០១៩។
ដូចទៅនឹងផ្កាយភាគច្រើននៅក្នុងកាឡាក់ស៊ី Milky Way ដែលយើងកំពុងស្ថិតនៅ ព្រះអាទិត្យនៅចុងបញ្ចប់នៃអាយុជីវិតរបស់វា នឹងរលាយក្លាយជាវត្ថុពណ៌សមួយគេហៅថា White Dwarf ដែលមានកំហាប់ណែនជាងភពផែនដី ២០០,០០០ដង ពោលសម្រាប់ការប្រៀបធៀបគ្នាវិញ គឺមួយស្លាបព្រាកាហ្វេនៃរូបធាតុរបស់វា មានទម្ងន់ស្មើនឹងសត្វដំរីមួយក្បាល។
ការសិក្សាស្រាវជ្រាវថ្មីមួយបានរកឃើញថា រាល់ White Dwarf ទាំងអស់នឹងប្រែក្លាយទៅជាដុំគ្រីស្តាល់រឹងមួយ ក្នុងដំណើរវិវត្តន៍របស់ពួកវា ដូចទៅនឹងអ្វីដែលធ្លាប់បានព្យាករណ៍ទុកពីសំណាក់ក្រុមទ្រឹស្តីវិទូកាលពីកន្លះសតវត្សរ៍មុនយ៉ាងដូច្នោះ ខណៈព្រះអាទិត្យ របស់យើងនឹងក្លាយទៅជាដុំបាល់គ្រីស្តាល់យក្សក្នុងពេល ១០ពាន់លានឆ្នាំខាងមុខ៕
