ចំណេះដឹងបន្ថែម! តើផែនដីគោចរជុំវិញព្រះអាទិត្យ និងវិលជុំវិញខ្លួនឯងដោយល្បឿនប៉ុន្មាន?
(បរទេស)៖ ផែនដីជាភពទី៣ នៅក្នុងប្រព័ន្ធព្រះអាទិត្យនេះ ដែលត្រូវបានចាត់ទុកជាភពថ្មមួយមានទំហំតូច ប៉ុន្តែធំជាងភពពុធ ភពសុក្រ និងភពអង្គារ។ ផែនដីត្រូវបានបង្កើតឡើងបន្ទាប់ពីការផ្ទុះនៃព្រះអាទិត្យដ៏ធំមួយកាលពី ៤.៦ពាន់លានឆ្នាំមុន ដែលជាការបង្កើតចេញនូវប្រព័ន្ធព្រះអាទិត្យដូចសព្វថ្ងៃនេះផងដែរ ហើយបើតាមការប៉ាន់ស្មានរបស់ក្រុមអ្នកវិទ្យាសាស្ត្រ ផែនដីនឹងមានអាយុកាល ៨ពាន់លានឆ្នាំ។ ដកស្រង់ពីបណ្តុំព័ត៌មាន និងឯកសារ Wikipedia។
ផែនដីមានចម្ងាយ ១៥០លានគីឡូម៉ែត្រពីព្រះអាទិត្យ (ជាគន្លងត្រឹមត្រូវ ដែលអ្នកវិទ្យាសាស្ត្រចាប់យកជាឧទាហរណ៍ ដើម្បីស្វែងរកពិភពភពផ្សេងៗទៀត ដែលអាចមានជីវិត)។ ផែនដីមានកាំប្រវែង ៦,៤០០គីឡូម៉ែត្រ និងបរិយាកាសគិតពីស្រទាប់ក្រោមបំផុត រហូតដល់មណ្ឌលមេសូ គឺមានកម្ពស់ជាង ៨០គីឡូម៉ែត្រ ប៉ុន្តែសម្រាប់ស្រទាប់អូហ្សូន គឺស្ថិតនៅក្នុងរយៈកម្ពស់ជិត ៥០គីឡូម៉ែត្រពីផ្ទៃដី។
ផែនដីវិលជុំវិញខ្លួនឯងក្នុងរយៈពេល ២៣ម៉ោង ៥៦នាទី និង ០៤វិនាទីក្នុងមួយជុំ ក្នុងល្បឿន ១,៦០០គីឡូម៉ែត្រក្នុងមួយម៉ោង។ ដោយឡែកផែនដីគោចរជុំវិញព្រះអាទិត្យ ក្នុងល្បឿន ៣០គីឡូម៉ែត្រក្នុងមួយវិនាទី ស្មើនឹង ៣៦៥.២៥៦ថ្ងៃ (មួយឆ្នាំ) ឬចម្ងាយធ្វើគោចរមួយជុំ ៩៤០លានគីឡូម៉ែត្រ។
បន្ថែមពីនេះទៀត ផែនដីមានផ្ទៃគ្របដណ្តប់ដោយទឹក ៧១ភាគរយ (៩៦.៥ភាគរយជាទឹកប្រៃ) និង២៩ភាគរយជាផ្ទៃដី។ នៅក្នុងឆ្នាំ២០១៧នេះ ចំនួនប្រជាជនពិភពលោកបានកើនឡើងដល់ ៧.៥ពាន់លាននាក់ហើយ។ ដោយឡែកសម្រាប់ចំណុចពិសេសៗដទៃទៀត Cambo Space នឹងលើកយកមកបង្ហាញ បងប្អូនអ្នកទស្សនា នៅក្នុងអត្ថបទក្រោយៗ៕
