(អាមេរិក)៖ មុនពេលព្រះអាទិត្យរះនាថ្ងៃចន្ទដើមសប្តាហ៍នេះ ភពចំនួន ០២ គឺភពសុក្រ និងភពសៅរ៍នឹងធ្វើដំណើរកាត់គ្នានៅលើផ្ទៃមេឃ (សំឡឹងទៅទិសខាងកើត ឈាងទៅខាងត្បូងបន្តិច)។ នេះបើតាមការដកស្រង់ការផ្សាយចេញពីវែបសាយព័ត៌មាន Space នៅល្ងាចថ្ងៃចន្ទ ទី១៨ ខែកុម្ភៈ ឆ្នាំ២០១៩។
ក្នុងចំណោមភពទាំងពីរភពសុក្រ (Venus) នឹងបញ្ចេញពន្លឺភ្លឺជាងភពសៅរ៍ (Saturn) ដែលមានពន្លឺស្ទង់ៗ ប៉ុន្តែអាចមើលឃើញដោយភ្នែកទទេ ខណៈបើមានកែវឆ្លុះគឺកាន់តែល្អថែមទៀត។ ម៉្យាងវិញទៀត ក្រៅពីភពសុក្រ និងភពសៅរ៍ ភពមួយទៀតគឺភពព្រហស្បតិ៍ (Jupiter) ក៏នឹងបង្ហាញខ្លួននៅលើផ្ទៃមេឃផងដែរ ជាមួយពន្លឺចែងចាំងជាងភពទាំងពីរទៅទៀត តែនៅឆ្ងាយពី Venus និង Saturn ។
គួរជម្រាបថា ភពសុក្រ និងភពសៅរ៍នឹងនៅកៀកគ្នា នាពេលវេលាម៉ោង ០៥៖៤៥នាទីមុនពេលថ្ងៃរះ ហើយអ្នកនឹងមើលឃើញពួកវានៅទិសអាគ្នេយ៍។ នាចុងឆ្នាំនេះ ពួកវាទាំងពីរនឹងជួបគ្នាជាថ្មីម្តងទៀត តែនៅលើផ្ទៃមេឃពេលល្ងាចម្តងនាថ្ងៃទី១១ ខែធ្នូ។ Venus និង Saturn ជាក់ស្តែងមិនមែនរំកិលជិតក្បែរមែនក្នុងទីអវកាសឡើយ ប៉ុន្តែវាគោចរចំចំណុចមួយ ដែលមើលពីផែនដីទៅគឺប្រៀបដូចភពទាំងពីរបានជួបគ្នាយ៉ាងដូច្នោះឯង។
ភពសុក្រ ត្រូវគេហៅថា «Inferior Planet» ដែលគោចរជុំវិញព្រះអាទិត្យលើគន្លង ខាងមុខគន្លងធ្វើដំណើររបស់ផែនដី ខណៈភពសៅរ៍គឺជា «Superior Planet» ដែលគោចរជុំវិញព្រះអាទិត្យ នៅក្រោយគន្លងរបស់ផែនដី។ សម្រាប់ពេលវេលាខាងលើនេះ គឺសម្រាប់អ្នកដែលរស់នៅសហរដ្ឋអាមេរិកប៉ុណ្ណោះ ឯអ្នកនៅកម្ពុជាយើងវិញ បងប្អូនអាចធ្វើការទស្សនាបាននៅព្រឹកព្រហាមថ្ងៃអង្គារស្អែកនេះ នៅមុនពេលថ្ងៃរះបាន ដើម្បីឃើញទិដ្ឋភាពភពសុក្រ នៅក្បែរសៅរ៍តាមទិសកំណត់ដូចគ្នា៕
