ពីមុនរកឃើញវត្ថុឆ្ងាយបំផុតថ្មី Farout តែឥឡូវនេះមានថ្មីមួយទៀតហើយនោះគឺ Farfarout ដែលទើបរកឃើញក្តៅៗ (រូបភាពខាងក្នុង)
(អាមេរិក)៖ តារាវិទូមួយក្រុមដឹកនាំដោយលោក Scott Sheppard បានប្រកាសពីការឃើញនៃវត្ថុថ្មី ដែលនៅចម្ងាយឆ្ងាយពីព្រះអាទិត្យបំផុត ក្នុងអំឡុងពេលតាមស្វែងរកភព X ឬភពទី៩ ដែលអ្នកវិទ្យាសាស្រ្តបានសន្និដ្ឋានថា កំពុងតែពួនសំងំនៅហួសភពភ្លុយតូ (Pluto) ទៅទៀត។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃអង្គារ ទី២៦ ខែកុម្ភៈ ឆ្នាំ២០១៩។
វត្ថុខាងលើត្រូវបានប៉ាន់ប្រមាណថា មានទីតាំងនៅចម្ងាយប្រហែល ១៤០AU (១AU ស្មើ១៥០លានគីឡូម៉ែត្រ ដែលជាគម្លាតរវាងព្រះអាទិត្យ និងផែនដី) ពីព្រះអាទិត្យ ហើយវាមានឈ្មោះមិនផ្លូវការថា FarFarOut ព្រោះវាបានបំណែកកំណត់ត្រារបស់វត្ថុមួយទៀតហៅថា FarOut ដែលស្ថិតនៅចម្ងាយ ១២០AU និងត្រូវបានរកឃើញដោយលោក Sheppard ដូចគ្នាកាលពីខែធ្នូ ឆ្នាំ២០១៨។
ចំណែកឯនៅមុនរបកគំហើញនៃ FarOut ភពមិនពេញលក្ខណៈ (Dwarf Planet) Eris ត្រូវបានអ្នកវិទ្យាសាស្រ្តចាត់ទុកថា ជាវត្ថុនៅឆ្ងាយពីព្រះអាទិត្យអាទិត្យបំផុត ជាមួយចម្ងាយ៩៦AU ខណៈ Pluto ស្ថិតនៅចម្ងាយត្រឹម ៣៤AU ប៉ុណ្ណោះ។ បន្ថែមពីនេះ FarOut មានកាំប្រវែង ២៥០គីឡូម៉ែត្រ ខណៈ FarFarOut ថ្មីនេះវិញគឺមិនទាន់មានការបញ្ជាក់ទេ។
គួរជម្រាបថា FarOut និង FarFarOut ជារបកគំហើញចុងក្រោយគេបំផុត នៃគម្រោងសិក្សាស្រាវជ្រាវរយៈពេលវែងមួយ ដែលផ្តោតចំពោះការវិភាគទៅលើទិន្នន័យស្តីពីតំបន់នៅចុងប្រព័ន្ធព្រះអាទិត្យ ដែលបានមកពីប្រព័ន្ធតេឡេស្កូបអុបទិកដ៏ខ្លាំងៗនៅលើផែនដីដូចជា Blanco 4-metre នៅឈីលី និង Sabaru 8-metre នៅហាវ៉ៃជាដើម។ ជាមួយគ្នានេះដែរ គន្លងរបស់ FarOut និង FarFarOut នៅតែជាអាថ៌កំបាំងដដែល ប៉ុន្តែមានការវាយតម្លៃជាបឋមថា FarOut អាចចំណាយពេលជាង ១,០០០ឆ្នាំ ដើម្បីធ្វើដំណើរជុំវិញព្រះអាទិត្យបានមួយជុំ៕
