មហាសេដ្ឋីលេខ១លើលោក ចង់ឲ្យមនុស្សទៅរស់នៅពាសពេញប្រព័ន្ធព្រះអាទិត្យ ឲ្យបានរហូតដល់ចំនួនរាប់ពាន់ពាន់លាននាក់!
(សាន់ហ្វ្រាន់ស៊ីស្កូ)៖ លោក Jeff Bezos ដែលជាម្ចាស់ក្រុមហ៊ុនលក់ទំនិញអនឡាញធំបំផុតលើពិភពលោក Amazon បានប្រាប់ថា លោកមានមហិច្ឆតាចង់បញ្ជូនមនុស្សមួយពាន់ពាន់ (ទ្រីលាន) ឲ្យរស់នៅក្នុងទីអវកាស។ នេះបើតាមការដកស្រង់ការផ្សាយចេញពីសារព័ត៌មាន Fox News នៅថ្ងៃព្រហស្បតិ៍ ទី២៨ ខែកុម្ភៈ ឆ្នាំ២០១៩។
កំពូលមហាសេដ្ឋីមានទ្រព្យសម្បត្តិច្រើនជាងគេបង្អស់រូបនេះ បានបង្ហើបឲ្យដឹងពីក្តីសម្រៃខាងលើរបស់លោក នៅក្នុងអំឡុងការថ្លែងសុន្ទរកថាមួយអំពីក្រុមហ៊ុនដឹកជញ្ជូនផ្នែកអវកាស Blue Origin ដែលលោកបានបង្កើតឡើងតាំងតែពីឆ្នាំ២០០០ ប៉ុន្តែពុំសូវមានភាពលេចធ្លោដូចក្រុមហ៊ុន SpaceX របស់មហាសេដ្ឋី លោក Elon Musk ប៉ុន្មានឡើយ។
គួរជម្រាបថា បើតាមលោក Bezos ការបង្កើនវត្តមានមនុស្សយ៉ាងច្រើនសន្ធឹកសន្ធាប់ នៅពាសពេញប្រព័ន្ធព្រះអាទិត្យ អាចផ្តល់ឲ្យយើងនូវអ្នកប្រាជ្ញាពូកែរាប់មិនអស់។ លោក Bezos បាននិយាយដូច្នេះថា «ប្រព័ន្ធព្រះអាទិត្យទ្រទ្រង់មនុស្សមួយទ្រីលាននាក់ហើយបន្ទាប់មកយើងនឹងមានអ្នកប្រាជ្ញដូចជា Mozarts និង Einsteins រាប់ពាន់នាក់»។
បច្ចុប្បន្ន ក្រុមហ៊ុន Blue Origin កំពុងអភិវឌ្ឍន៍បច្ចេកវិទ្យាខុសៗគ្នាមួយចំនួន សម្រាប់ការហោះឡើងទៅកាន់ទីអវកាស និងកំពុងព្យាយាមធ្វើឲ្យសេវារបស់ខ្លួនមានតម្លៃធូរថ្លៃ ឆ្ងាយជាងក្រុមហ៊ុនបម្រើវិស័យអវកាសដទៃទៀត សម្រាប់អង្គការក៏ដូចជាស្ថាប័ននានា ដែលមានបំណងចង់បញ្ជូនរបស់ឡើងទីអវកាស៕
