តើវត្ថុចម្លែក Ultima Thule នេះមានអ្វីពិសេសខ្លះ? ទីបំផុតយាន New Horizons អាចបកស្រាយអំពីវាខ្លះៗហើយ!
(វ៉ាស៊ីនតោន)៖ ក្រុមការងារនៃបេសកកម្ម New Horizons របស់ទីភ្នាក់ងារអវកាស អាមេរិក NASA នាថ្ងៃចន្ទសប្តាហ៍នេះបានបកស្រាយឲ្យដឹង នូវអាថ៌កំបាំងមួយចំនួននៃដុំថ្មអវកាស Ultima Thule ដែលស្ថិតក្នុងតំបន់ខ្សែក្រវាត់ខៃភើ (Kuiper Belt) នៅឯចុងប្រព័ន្ធព្រះអាទិត្យ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅថ្ងៃអង្គារ ទី១៩ ខែមីនា ឆ្នាំ២០១៩។
យានអវកាស New Horizons បានធ្វើការហោះឆ្វែល (Flyby) ដែលឆ្ងាយពីផែនដីបំផុតក្នុងប្រវត្តិសាស្រ្ត កាលពីថ្ងៃឆ្លងឆ្នាំសកល ដោយវាបានធ្វើដំណើរទៅកាន់ចម្ងាយ ៣,៥៤៩គីឡូម៉ែត្រពីផ្ទៃរបស់ថ្មអវកាសនេះ ជាមួយល្បឿន ៥០,៦៩៤គីឡូម៉ែត្រក្នុងមួយម៉ោង។ បើតាមសេចក្តីប្រកាសរបស់ NASA តាមរយៈការវិភាគលើទិន្នន័យទាំងប៉ុន្មាន ដែល New Horizons បានបន្តបញ្ជូនមក កាន់ផែនដីចាប់តាំងពីពេលនោះមក ក្រុមអ្នកវិទ្យាសាស្រ្ត កំពុងបង្កើនការយល់ដឹងកាន់តែច្រើនអំពីសណ្ឋាន ភូមិសាស្រ្ត និងសមាសធាតុ របស់វត្ថុបុរាណមួយនេះ ដែលនៅសេសសល់ពីការកកើតនៃប្រព័ន្ធផ្កាយរបស់យើង។
គួរជម្រាបថា អ្វីដែលអ្នកវិទ្យាសាស្រ្តរបស់អង្គការ NASA បានដឹងនាពេលនេះ គឺវាច្បាស់ ១០០ភាគរយថា Ultima Thule គឺជាដុំថ្មអវកាសពីរដែលនៅជាប់គ្នា ដោយផ្នែកមួយមានរាងសំប៉ែត និងធំត្រូវគេដាក់ឈ្មោះឲ្យថា Ultima និងផ្នែកមួយទៀតរាងតូច តែមានលក្ខណៈមូលជាងត្រូវបានហៅថា Thule។ ដុំថ្មទាំងពីរត្រូវគេជឿថា កាលពីអតីតកាលធ្លាប់បានគោចរជុំវិញគ្នា រហូតដល់ពេលអ្វីម៉្យាងបានធ្វើឲ្យពួកវាខាំជាប់គ្នា។
រីឯពណ៌និងសមាសធាតុនៃដុំថ្មអវកាស Ultima Thule គឺមានពណ៌ក្រហមខ្លាំង ពោលគឺក្រហមខ្លាំងជាងភពមិនពេញលក្ខណៈ ភ្លុយតូ (Pluto) ទៅទៀត ដែលត្រូវបានយាន New Horizons ហោះកាត់កាលពី២០១៥ នៅតំបន់ផ្នែកខាងក្នុងនៃខ្សែក្រវាត់ខៃភើ ។ ក្រៅពីនេះអ្នកវិទ្យាសាស្រ្ត ក៏បានឃើញពីភស្តុតាងនៃសារធាតុមេតាណុល ទឹកកក និងម៉ូលេគុលសរីរាង្គ នៅលើផ្ទៃរបស់ដុំថ្ម Ultima Thule។
បច្ចុប្បន្នយានអវកាស New Horizons កំពុងស្ថិតនៅចម្ងាយ ៦.៦ពាន់លានគីឡូម៉ែត្រពីភពផែនដី៕
