បេសកកម្មថ្មី! NASA គ្រោងបញ្ជូនយានទៅអាចម៍ផ្កាយយក្ស Pallas ស្ថិតចន្លោះភពព្រហស្បតិ៍ និងភពអង្គារ
(អាមេរិក)៖ ទីភ្នាក់ងារអវកាសអាមេរិក NASA កំពុងពិចារណាប្រើប្រាស់ថវិកាសម្រាប់បេសកកម្មមួយ ដែលនឹងបញ្ជូនយានខ្នាតតូចមួយគ្រឿង ទៅកាន់តំបន់ខ្សែក្រវាត់អាចម៍ផ្កាយ (Asteriod Belt) ដើម្បីសិក្សាអំពីអាចម៍ផ្កាយធំមួយឈ្មោះថា Pallas ដែលមានមុខកាត់ ឬអង្កត់ផ្ចិត ៥៤៥គីឡូម៉ែត្រ។ នេះបើតាមការដកស្រង់ការផ្សាយចេញពីវែបសាយព័ត៌មានវិទ្យាសាស្រ្ត-អវកាស Space នៅរសៀលថ្ងៃសុក្រ ទី២២ ខែមីនា ឆ្នាំ២០១៩។
ការសម្រេចចិត្តលើផែនការខាងលើនឹងត្រូវប្រកាសជាផ្លូវការ នៅពាក់កណ្តាលខែមេសាខាងមុខ។ ប្រសិនបើបេសកកម្មដែលនឹងត្រូវហៅថា Athena នេះ ទទួលបានការអនុញ្ញាតនោះ វានឹងដើរតាមគន្លងផ្លូវរបស់យានអវកាស Dawn ជាយានដែលបានធ្វើការសិក្សាស្រាវជ្រាវ ទៅលើវត្ថុអវកាសធំៗ (ភពបម្រុង) ចំនួនពីរនៅតំបន់ Asteriod Belt (តំបន់ចន្លោះភពព្រហស្បតិ៍ និងអង្គារ) គឺ Vesta និង Ceres មុនពេលបេសកកម្មរបស់វាត្រូវបានអង្គការ NASA ប្រកាសបិទបញ្ចប់កាលពីដើមខែវិច្ឆកា ឆ្នាំ២០១៨ ដោយសារយាននេះអស់ឥន្ធនៈ។ បច្ចុប្បន្ន Dawn កំពុងនៅរសាត់តែលតោលក្បែរៗ Ceres។
គួរជម្រាបថា បើតាមអ្នកវិទ្យាសាស្រ្ត Pallas គឺជាវត្ថុតែមួយគត់នៅក្នុងតំបន់ខ្សែក្រវាត់អាចម៍ផ្កាយ ដែលមានលក្ខណៈដូច Vesta និង Ceres គឺវាមិនត្រឹមជាអាចម៍ផ្កាយប៉ុណ្ណោះទេ តែជា Protoplanet ពោលគឺជាអំប្រីយ៉ូភព ដែលត្រូវគេជឿជាក់ថា កំពុងមានការវិវត្តន៍ប្រែក្លាយទៅជាភពពេញលេញមួយ ដូចពេញទាំង ០៨ សព្វថ្ងៃនៅក្នុងប្រព័ន្ធព្រះអាទិត្យរបស់យើង។
បើ Athena ត្រូវបានជ្រើសរើស បេសកកម្មនេះនឹងត្រូវចេញដំណើរនៅខែសីហា ឆ្នាំ២០២២ ទៅជាមួយបេសកកម្មមួយទៀតរបស់ NASA ហៅថា Psyche ដែលត្រូវទៅសិក្សាអាចម៍ផ្កាយមួយ ដែលមានសមាសធាតុផ្សំស្ទើរតែពីលោហៈទាំងស្រុង៕
