មិនធ្លាប់មាន! អ្នកវិទ្យាសាស្ត្រអង្កេតឃើញ «ព្យុះខ្មៅយក្សប៉ុនភពផែនដី» ចាប់កំណើតនៅភពណិបទូន (រូបភាពខាងក្នុង)

(អាមេរិក)៖ ទីបំផុតអ្នក​វិទ្យាសាស្រ្ត​បានមើលឃើញជាលើកដំបូង នូវកំណើតនៃ ព្យុះធំមួយក្នុងចំណោមព្យុះយក្សពណ៌ខ្មៅ ដែលគេហៅថា «Great Dark Spot» នៅលើភពណិបទូន។ នេះបើតាមការដកស្រង់ការផ្សាយចេញពីវែបសាយព័ត៌មាន​វិទ្យាសាស្រ្ត-អវកាស Space នៅថ្ងៃអង្គារ ទី២៦ ខែមីនា ឆ្នាំ២០១៩។

ក្នុងអំឡុងពេលសិក្សាលើ​បណ្តុំរូបភាព ដែលថតបានដោយកែវយឺតអវកាស Hubble អំពីព្យុះតូចមួយលើណិបទូន ដែលបានលេចឡើងកាលពីឆ្នាំ២០១៥ អ្នកវិទ្យាសាស្រ្ត បានកត់សម្គាល់ឃើញសំណុំពពកពណ៌សភ្លឺៗ កកើតឡើងនៅក្នុងតំបន់មួយផ្សេងទៀត លើភពយក្សដ៏ត្រជាក់នេះ។ នាដើមសប្តាហ៍នេះ អ្នកវិទ្យាសាស្រ្តបានប្រកាសថា មកដល់ឆ្នាំ២០១៨ ព្យុះយក្សពណ៌ខ្មៅមួយ ដែលមានទំហំប៉ុនភពផែនដី ក៏បានចាប់កំណើតឡើង​នៅក្នុងតំបន់នោះ។

គួរជម្រាបថា ការរកឃើញខាងលើបានធ្វើឲ្យចំនួនព្យុះ Great Dark Spot ដែលអ្នកវិទ្យាសាស្រ្ត​បានអង្កេតនៅលើភពណិបទូនកើនដល់ ០៦ ដោយព្យុះ Great Dark Spot ពីរដំបូងគេត្រូវបានយាន Voyager 2 របស់ទីភ្នាក់ងារអវកាសអាមេរិក NASA ប្រទះឃើញអំឡុងការហោះឆ្វែលណិបទូន កាលពីខែសីហា ឆ្នាំ១៩៨៩៕