ទីបំផុត NASA ប្រកាសពីគំរោង «បញ្ជូនយានទៅកៀកព្រះអាទិត្យបំផុត» ចម្ងាយតែ ៦.៤លានគីឡូម៉ែត្រ នៅឆ្នាំ២០១៨!
(វ៉ាស៊ីនតោន)៖ អង្គការ NASA បានធ្វើសេចក្តីប្រកាស អំពីគម្រោងដ៏អស្ចារ្យមួយនាថ្ងៃព្រហស្បតិ៍នេះ ទាក់ទិននឹងបេសកកម្មដំបូងបំផុត ដែលពុំធ្លាប់មានពីមុនមកឡើយ គឺការធ្វើដំណើរឆ្តោះទៅយ៉ាងកៀក បរិយាកាសដ៏សែនក្តៅរបស់ព្រះអាទិត្យ។ នេះបើតាមការដកស្រង់ការផ្សាយ ចេញពីគេហទំព័រវិទ្យាសាស្រ្ត Space.com នៅរសៀលថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។
យោងតាមសេចក្តីថ្លែងការណ៍មួយ របស់ទីភ្នាក់ងារអវកាស NASA បេសកកម្ម Solar Probe Plus ត្រូវបានគេកំណត់ពេលវេលាថា នឹងធ្វើការចាប់ផ្តើមក្នុងរដូវក្តៅនៃឆ្នាំ២០១៨ ហើយនឹងវាធ្វើដំណើរគោចរក្នុងរយៈចម្ងាយ ៦.៤លានគីឡូម៉ែត្រ ពីផ្ទៃរបស់ព្រះអាទិត្យ ជាទីដែលយានអវកាសនេះ នឹងប្រឈមមុខជាមួយកម្តៅរួមទាំងវិទ្យុសកម្មដ៏ខ្លាំងមហិកមា ដែលយានអវកាសដទៃៗទៀតពុំធ្លាប់បានជួបប្រទះ ឬឆ្លងកាត់ពីមុនមកឡើយ នៅក្នុងប្រវត្តិសាស្រ្តនៃការុករកក្នុងទីអវកាស។
គួរបញ្ជាក់ថា បេសកកម្មជាប្រវត្តិសាស្រ្ត នឹងធ្វើការរុករកក៏ដូចជាស្រាវជ្រាវបរិយាកាសស្រទាប់ខាងក្រៅនៃព្រះអាទិត្យ និងធ្វើការអង្កេតឃ្លាំមើលដ៏សំខាន់០២ផ្សេងៗ ដែលអាចផ្តល់ចម្លើយដល់ការងឿងឆ្ងល់ រាប់ទសវត្សរ៍ទាំងប៉ុន្មានពាក់ព័ន្ធនឹងផ្កាយរបស់យើង។ ម៉្យាងវិញទៀត ទិន្នន័យក៏ដូចជារបកគំហើញនានា ដែលនឹងទទួលបានពីបេសកកម្មនេះ នឹងជួយបង្កើតប្រសិទ្ធភាព នៃការព្យាករណ៍ព្រឹត្តិការណ៍ធំៗ ស្តីពីអាកាសធាតុអវកាស ដែលអាចជះផលប៉ះពាល់ធ្ងន់ធ្ងរដល់ជីវិតនៅភពផែនដីរបស់យើង ក៏ដូចជាផ្កាយរណប និងក្រុមអវកាសយានិកនៅក្នុងលំហអាកាសផងដែរ៕
