James Webb សម្រាប់ឆ្លុះមើលភពអេលៀន ទើបសម្រេចតេស្តដ៏សំខាន់មួយ និងត្រៀមបង្ហោះនៅឆ្នាំ២០២១
(អាមេរិក)៖ កែវយឺតអវកាសជំនាន់ថ្មីរបស់ទីភ្នាក់ងារអវកាស NASA គឺ James Webb ទើបតែបានឆ្លងកាត់ការធ្វើតេស្តមួយទៀតដោយជោគជ័យ ក្នុងដំណើរឆ្ពោះទៅរកការបាញ់បង្ហោះនៅឆ្នាំ២០២១ ខណៈការពន្យារពេលម្តងហើយម្តងទៀត ត្រូវបានធ្វើឡើងតាំងតែពីឆ្នាំ២០១៥ មកម្ល៉េះ។ នេះបើតាមការដកស្រង់ការផ្សាយចេញពីវែបសាយព័ត៌មាន Space នៅថ្ងៃចន្ទ ទី១២ ខែសីហា ឆ្នាំ២០១៩។
ក្រុមបច្ចេកទេសរបស់អង្គការ NASA ទើបបានសម្រេចជោគជ័យ ក្នុងការធ្វើតេស្តដំឡើងផ្ទាំងកញ្ចក់ដ៏សំខាន់មួយ ទៅលើកែវយឺតអវកាស James Webb។ កញ្ចក់នោះមានរាងមូល និងមានមុខងារជាកញ្ចក់ជំនួយ ដែលត្រូវបានដាក់ឲ្យស្ថិតចំពីខាងមុខបណ្តុំកញ្ចក់យ៉ាងធំមួយដែលមានមុខងារជាផ្ទាំងកញ្ចក់ស្នូល និងមានរាងដូចផ្លិតឃ្មុំ។
ទោះបីមានឈ្មោះជាកញ្ចក់ជំនួយក៏ដោយ វានឹងដើរតួនាទីយ៉ាងសំខាន់ ក្នុងការកំណត់ជោគជ័យរបស់បេសកកម្មកែវយឺត James Webb។ ខណៈក្រុមកញ្ចក់ស្នូលប្រមូលពន្លឺពីវត្ថុដែល James Webb អង្កេតឃើញក្នុងទីអវកាស កញ្ចក់ជំនួយនោះ មានតួនាទីធ្វើការប្រមូលសញ្ញាពន្លឺពីកញ្ចក់ធំនោះ ដែលរួមផ្សំឡើងកញ្ចក់ទាំងអស់ ១៨ផ្ទាំងមកផ្តុំគ្នា រួចបញ្ជូនបន្តទៅឲ្យឧបករណ៍វិទ្យាសាស្រ្តដទៃទៀត ដើម្បីសិក្សា និងវិភាគទៅលើទិន្នន័យដែលប្រមូលបាន។
គួរជម្រាបថា នៅពេលកែវយឺត James Webb ត្រូវបានផ្គុំពេញលក្ខណៈទាំងស្រុង វានឹងត្រូវគេបាញ់បញ្ជូនចេញពីផ្ទៃផែនដីឆ្ពោះ ទៅកាន់ទីអវកាសនៅខែមីនា ឆ្នាំ២០២១ តាមរយៈគ្រាប់រ៉ុក្កែត Ariane 5 របស់អឺរ៉ុប។ គម្រោងបាញ់បង្ហោះរបស់វា ធ្លាប់ត្រូវបាន លើកពេលជាច្រើនដងមកហើយ ខណៈទំហំនៃការចំណាយរបស់កែវយឺតនេះ គិតត្រឹមខែមិថុនា ឆ្នាំ២០១៩ គឺ ៩.៧ពាន់លានដុល្លារអាមេរិក។
James Webb ត្រូវបាន NASA ចាត់ទុកថា ជាអ្នកបន្តវេនពីកែតយឺតឈ្មោះថា Hubble ដែលបានបំពេញបេសកកម្មជិត ៣០ឆ្នាំហើយក្នុងទីអវកាស។ ក្រោយពីបាញ់បង្ហោះ វានឹងធ្វើដំណើរចម្ងាយ ១.៦លានគីឡូម៉ែត្រទៅកាន់ទីតាំងដែលត្រូវធ្វើប្រតិបត្តិការ។ លក្ខណៈពិសេសបំផុតរបស់ James Webb គឺវាអាចធ្វើការជះរលកសញ្ញាទៅលើភពអេលៀនណាមួយដើម្បីឲ្យដឹងថា តើភពនោះមានបរិយាកាសផ្សំឡើងពីសារធាតុអ្វីខ្លះ។ បើសិនជាអ្នកវិទ្យាសាស្ត្រដឹងថា ភពអេលៀនមួយណាមានបរិយាកាសបែបណានោះ វាប្រាកដណាស់ថា ការសន្និដ្ឋានអំពីវត្តមាននៃជីវិតនៅទីនោះ គឺកាន់តែងាយស្រួលបំផុត៕
