(បរទេស)៖ អ្នកវិទ្យាសាស្រ្តអូស្រ្តាលីបានអះអាងថា បាតុភូតប្រហោងខ្មៅលេបត្របាក់ផ្កាយណឺត្រុង ទំនងជាទើបត្រូវបានប្រទះឃើញជាលើកដំបូង។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅថ្ងៃអង្គារ ទី២០ ខែសីហា ឆ្នាំ២០១៩។
កាលពីថ្ងៃទី១៤ ខែសីហាថ្មីៗនេះ រលកទំនាញ Gravitational Wave មួយ ដែលទំនងជាបង្កឡើងពីព្រឹត្តិការណ៍ «ប្រហោងខ្មៅលេបត្របាក់ផ្កាយណឺត្រុង» ត្រូវបានប្រទះឃើញនៅចម្ងាយប្រហែល ៨,៥៥០លានឆ្នាំពន្លឺពីយើង ដោយប្រព័ន្ធតេឡេស្កូប LIGO ដែលស្ថិតនៅសហរដ្ឋអាមេរិក និងប្រព័ន្ធតេឡេស្កូប Virgo នៅប្រទេសអ៊ីតាលី។ ប្រការនេះមានន័យថា វាបានកើតឡើងកាលពី ៨,៥៥០លាន ឆ្នាំកន្លងទៅ ប៉ុន្តែឥទ្ធិពលវាទើបតែបានជះដល់ផែនដីកាលពីប៉ុន្មានថ្ងៃមុន។
ខណៈរលកទំនាញ Gravitational Wave ដែលធ្លាប់ត្រូវប្រទះឃើញកន្លងមក គឺកើតចេញពីបាតុភូតប្រហោងខ្មៅពីររួមចូលគ្នា និងផ្កាយណឺត្រុងពីរបុកគ្នានោះ អ្នកវិទ្យាសាស្រ្តមានការជឿជាក់ខ្ពស់ថា រលកទំនាញដែលពួកគេប្រទះឃើញ កាលពីថ្ងៃពុធសប្តាហ៍មុន គឺត្រូវបានបង្កឡើងដោយព្រឹត្តិការណ៍ប្រហោងខ្មៅ លេបផ្កាយណឺត្រុង។
គួរបញ្ជាក់ថា ផ្កាយណឺត្រុង (Neutron Star) គឺជាប្រភេទផ្កាយដែលមានទំហំតូច (ជាមធ្យមមានមុខកាត់តែ ៣០គីឡូម៉ែត្រប៉ុណ្ណោះ ប៉ុន្តែម៉ាស់វាធ្ងន់ជាងព្រះអាទិត្យយើងទៅទៀត) ដែលវាកើតចេញពីការស្លាប់ ឬផ្ទុះនៃតារាធំៗ ដែលមានម៉ាស់ចន្លោះចាប់ពី ១០-២៩ដងធំជាងម៉ាស់ព្រះអាទិត្យយើង។ ថ្វីត្បិតតែវាតូចពិតមែន តែកំហាប់របស់វាពិតជាខ្លាំងអស្ចារ្យបំផុត (ពោពេញដោយធាតុដែក) រួមជាមួយទម្ងន់ក៏ធ្ងន់បំផុតដែរ ហើយគេនិយមហៅវាថា White Hole។
