តើបណ្តុំពពកពណ៌ខៀវភ្លឺៗនោះជាអ្វី? (ថតបានពីស្ថានីយអវកាសអន្តរជាតិ) (វីដេអូ)

(បរទេស)៖ កាលពីឆ្នាំ ២០២១ កន្លងទៅនេះ អវកាសយានិកមួយរូបនៅលើ ស្ថានីយអវកាសអន្តរជាតិ (ISS) បានផ្តិតរូបភាពមួយសន្លឹក ទៅលើផ្ទៃភពផែនដីនាពេលរាត្រី ហើយក៏បានប្រទះឃើញ «បណ្តុំពពកពណ៌ខៀវភ្លឺៗ» ចំនួន ២ ដោយមួយនៅក្រោម និងមួយទៀតនៅខាងស្តាំនៃរូបភាព។

យោងតាមអ្នកជំនាញអង្គការ NASA រូបនេះត្រូវបានថតនៅពេល ISS ចល័តទៅលើ តំបន់ចុងសមុទ្រចិនខាងត្បូង (South China Sea) និងទើបត្រូវបានបញ្ចេញ នៅក្នុងខែតុលា ឆ្នាំ២០២២ នេះប៉ុណ្ណោះ។ វាមិនមែនជាអព្ភូតហេតុចម្លែកអ្វីនោះឡើយ តែមានកត្តា ២ ដែលបានបង្កឲ្យមានចំណុចភ្លឺៗទាំងនោះឡើង។

* សម្រាប់ចំណុចទី ១ ដែលស្ថិតនៅក្រោមរូបភាពនោះ គឺជាបណ្តុំពពកមានពន្លឺពណ៌ខៀវ ស្ថិតនៅពីលើឈូងសមុទ្រថៃ (Gulf of Thailand) ដែលជាចំណុចកើតមានផ្គររន្ទះ យ៉ាងខ្លាំក្លាបំផុតនៅពេលនោះ។ ជាធម្មតាផ្លេកបន្ទោរកើតមានលើផែនដី កម្រត្រូវបានមើលឃើញពីលើ ISS ណាស់ ប៉ុន្តែបាតុភូតនោះ បានបង្ហាញឲ្យអវកាសយានិកឃើញ និងថតបាន ព្រោះតែផ្លេកបន្ទោរនោះមានសកម្មភាពកញ្ជ្រោលខ្លាំង ឡើងមកដល់ស្រទាប់ពពកផ្នែកខាងលើ និងស្ថិតក្នុងចំនួនច្រើនផងដែរ។

* សម្រាប់ចំណុចទី ២ ដែលស្ថិតនៅខាងស្តាំខ្ពស់បន្តិចនៃរូបភាពនោះ មិនមែនជាផ្គររន្ទះអ្វីឡើយ តែជាចំណាំងនៃពន្លឺរបស់ព្រះចន្ទ មកលើស្រទាប់បរិយាកាសភពផែនដី។ ព្រះចន្ទមិនអាចបញ្ចេញពន្លឺ ដោយខ្លួនឯងបានទេ តែអាចបង្កើតចំណាំងផ្លាតនៃពន្លឺព្រះអាទិត្យបាន ហើយពន្លឺនោះបានចាំងមកលើស្រទាប់បរិយាកាសផែនដី ដូចក្នុងរូបភាពនេះឯង។

គួរបញ្ជាក់ថា ពន្លឺដែលភ្នែកយើងអាចមើលឃើញនោះ ក៏មានប្រវែងរលក (wavelengths) ខុសៗគ្នាផងដែរ ដែលប៉ះពាល់ដល់អន្តរកម្មរបស់ពួកវា ពេលត្រូវជាមួយភាគល្អិត (particles) នៅក្នុងបរិយាកាសផែនដី។ ពន្លឺពណ៌ខៀវត្រូវបានគេដឹងថា មានរលកប្រវែងខ្លីជាងគេបំផុត ហើយក៏ងាយបែកសាចផងដែរ ហេតុដូច្នេះពេលពន្លឺព្រះចន្ទឆ្លងកាត់ ស្រទាប់បរិយាកាសផែនដី ក៏ប្រែទៅជាពណ៌ខៀវវិញ។ ដោយឡែកសម្រាប់ពន្លឺផ្ទេកបន្ទោរមានពណ៌ខៀវនោះ គឺជារឿងធម្មតាទៅហើយ៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/NASA (ថ្ងៃព្រហស្បតិ៍ ទី២០ ខែតុលា ឆ្នាំ២០២២)