ផ្ទាំងទឹកកកយក្សទំហំប៉ុនទីក្រុង London របេះចេញពីទ្វីបអង់តាកទិកហើយ! (មានវីដេអូ)
(បរទេស)៖ យោងតាមមូលដ្ឋានស្រាវជ្រាវរបស់ចក្រភពអង់គ្លេស (BAS) ប្រចាំនៅអង់តាកទិកបានប្រកាសឲ្យដឹងថា ផ្ទាំងទឹកកកយក្សដែលមានទំហំ ប្រហាក់ប្រហែលនឹងទីក្រុងឡុងដ៍ (London) នៃចក្រភពអង់គ្លេសនោះ បានរបេះចេញពីធ្នើទឹកកកមួយឈ្មោះ Brunt Ice Shelf នៃទ្វីបស្ថិតនៅប៉ូលខាងត្បូងភពផែនដីនោះហើយ កាលពីថ្ងៃទី២២ ខែមករា ឆ្នាំ២០២៣។
ផ្ទាំងទឹកកកដ៏ធំមហាសាលនោះ ត្រូវបានដាក់ឈ្មោះសម្គាល់ឲ្យថា Iceberg-A81 និងត្រូវបានក្រុមអ្នកជំនាញគណនាថា មានទំហំ ១,៥៥០គីឡូម៉ែត្រក្រលា ហើយរូបភាពនៃការប្រេះចេញរបស់ A81 នោះត្រូវបានផ្តិតយកដោយផ្កាយរណប Terra នៃអង្គការ NASA។ ការប្រេះចេញនេះបានកើតមានឡើង នៅតំបន់កើតមានស្នាមប្រេះដ៏ធំ ដែលត្រូវបានគេដាក់ឈ្មោះថា ស្នាមប្រេះ Chasm 1 ហើយក៏ជាតំបន់មួយនៃទ្វីបអង់តាកទិក ដែលស្ថិតក្នុងការតាមដានជាប់ជានិច្ចចាប់តាំងពីទសវត្សរ៍ ១៩៧០ ផងដែរ។
គួរបញ្ជាក់ថា កាលអំលុងទសវត្សរ៍ ១៩៧០ នោះ ស្នាមប្រេះ Chasm 1 បានលេចឡើង ហើយក្រោយមកក៏មានការស្ងប់ស្ងាត់វិញបន្តិច។ ប៉ុន្តែនៅក្នុងឆ្នាំ ២០១២ ស្នាមប្រេះនោះក៏ចាប់ផ្តើមរីកធំឡើងវិញ នៅក្នុងកម្រិត ៤គីឡូម៉ែត្រក្នុង ១ឆ្នាំ រហូតដល់ដើមឆ្នាំ ២០១៩។ ទោះបីជាកម្រិតនេះមានភាពយឺតយ៉ាវក៏ដោយ រហូតដល់ចុងឆ្នាំ ២០២២ និងដើមឆ្នាំ ២០២៣ នេះ ដែលជារដូវក្តៅនៅទ្វីបអង់តាកទិក ស្នាមប្រេះក៏បានកើតឡើងខ្លាំង ហើយក៏បង្កការរបេះចេញនូវផ្ទាំងទឹកកក A81 នោះតែម្តង។
យ៉ាងណាក៏ដោយ ក្រុមអ្នកវិទ្យាសាស្ត្រអង្គការ NASA បានអះអាងថា នេះជាដំណើរធម្មជាតិនៃការកកើត និងប្រេះស្រាំទៅវិញនៃធ្នើទឹកកកទ្វីបអង់តាកទិកប៉ុណ្ណោះ។ តែយ៉ាងណា ការប្រែប្រួលបរិយាកាសភពផែនដី ក៏បានជួយជំរុញល្បឿននៃដំណើរការនេះផងដែរ ដូចអ្វីដែលធ្លាប់បានកើតមានជាច្រើនករណីមកហើយ នៅទ្វីបទឹកកកនេះ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA (ថ្ងៃពុធ ទី២៥ ខែមករា ឆ្នាំ២០២៣)
