NASA ថតបានទិដ្ឋភាពថ្ងៃលិចលើភពអង្គារ ដែលស្រដៀងៗភពផែនដីយើង (មានរូបភាព)
(បរទេស)៖ សម្រាប់អនាគតមនុស្សមួយចំនួន ដែលអាចនឹងទៅរស់នៅភពព្រះអង្គារនោះ ទិដ្ឋភាពទាំងនេះនឹងអាចលួងចិត្តពួកគេ មិនឲ្យនឹករលឹកភពផែនដីបានខ្លះៗដែរ។ ជាក់ស្តែងដូចរូបភាពថ្មីៗ ដែលយានស្រាវជ្រាវលើផ្ទៃភពអង្គាររបស់អង្គការ NASA ទើបផ្តិតបានលើភពអង្គារ (Mars) នេះ មានដូចជាពពកបញ្ចេញពន្លឺក្រោយថ្ងៃលិច និងកាំរស្មីព្រះអាទិត្យជះមកពីក្រោយជួរភ្នំ អាចឲ្យលោកអ្នកច្រលំថា ជាទិដ្ឋភាពលើផែនដីយើងបាន។
រូបភាព ២សន្លឹកថ្មីនេះ ត្រូវបានយាន Curiosity ផ្តិតនៅលើភពអង្គារ ខណៈវាកំពុងស្ថិតនៅក្នុងរណ្តៅ Gale Crater។ ទិដ្ឋភាពថ្ងៃទើបលិចលើភពអង្គារ បានបង្ហាញពីកាំរស្មីព្រះអាទិត្យ (sun rays) ជះចេញជាឆ្នូតៗពីក្រោយជួរភ្នំ ទៅលើពពកភពអង្គារ ព្រមទាំងបណ្តុំពពកដែលរងពន្លឺពីព្រះអាទិត្យ ហើយទិដ្ឋភាពបែបនេះក៏មិនសូវខុសពីនៅលើភពផែនដីប៉ុន្មានដែរ។
សម្រាប់ពាក្យថា «sun rays» ក៏ត្រូវបានស្គាល់ជាភាសាឡាទីនថា «crepuscular rays» ផងដែរ ដោយចង់សំដៅទៅលើកាំរស្មី «twilight» (រស្មីពេលព្រលប់) នោះឯង។ នេះជាលើកទី ១ ហើយដែលអង្គការ NASA ថតបានទិដ្ឋភាពបែបនេះនៅលើភពអង្គារ ឬអាចថាជា ទិដ្ឋភាពកម្របំផុត ដែលមិនងាយកើតឡើងដូចនៅលើផែនដីឡើយ។
គួរបញ្ជាក់ថា បណ្តុំពពកភាគច្រើនលើភពអង្គារ គឺស្ថិតនៅរយៈកម្ពស់ខ្ទង់ ៦០គីឡូម៉ែត្រពីលើផ្ទៃដី ហើយភាគច្រើនពពកទាំងនោះផ្ទុកទៅដោយទឹកកក។ ប៉ុន្តែសម្រាប់ពពកដែលបង្កឲ្យមាន ចំណាំងរវាងកាំរស្មីព្រះអាទិត្យខាងលើនេះ អាចស្ថិតនៅរយៈកម្ពស់ខ្ពស់ និងត្រជាក់ជាងនេះ ដែលពោពេញទៅដោយ កាបូនឌីអុកស៊ីតកក ឬទឹកកកស្ងួត៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE (ថ្ងៃព្រហស្បតិ៍ ទី០៩ ខែមីនា ឆ្នាំ២០២៣)
